Оройн хоол

Хүүхдээ төрүүлээд гэртээ сууж байгаа. Тийм болохоор энэ хугацаандаа гэрийн даамлын ажлыг бас үүрэх болж байна.

Гэрээ цэвэрлэх: Дургүй хүрээд байвал хийхгүй. Ийм болохоор өөрийн гэсэн орон гэртэй байх сайхаан. Дур хүрвэл тачигнатал нь цэвэрлэнэ. Гэхдээ орой аавыг ирэхийн өмнө бол ямар ч байсан цэвэрлэнэ л дээ. Миний хувьд гаднаас ороод ирэхэд гэр орон цэвэрлээгүй байвал уур хүрээд, уушиг сагсайгаад явчдаг гэмтэй тул бусдыг бас тэгдэг байх гэж бодоод, тийм байдалд оруулахгүйсэн гээд хичээдэг.

Хоол хийх: Оройн хоол гэж нэг том ажил байна аа. Хийх нь яахав, харин ямар? гэдэг нь. Аав заримдаа "Нээх сайхан юм идэхийнсаан" гэж санаа алдах нь миний хийсэн, хичээсэн бүхнийг юу ч биш болгочихдог болохоор үнэхээр урамгүй. Жил гурван зуун жаран тав хоногтой, хоолны материал тогтмол будаа, гоймон, гурил, төмс болон жижүүрийн хүнсний ногоо, амтлагчны хувьд дашида, давс, хар перец болохоор олон янзын хоол хийх гээд яалтай билээ.
Будаатай хуурга, цуйван, бууз (бараг л хийдэггүй), хуушуур, гоймонтой хуурга, ногоотой хуурга, бүхэл мах, гурилтай, будаатай, гоймонтой, ногоотой шөлнүүд, мөөгтэй хуурга, тагтуритан, бибимбам (нэг удаа хийсэн, их гоё болсон) гээд нөгөө хэдийгээ шарж нэг үзээд, жигнэж нэг үзээд, хуурч нэг үзээд янз янз болгоод ч хүрээ хязгаараасаа тэлэхгүй юм чинь яалтай билээ дээ.

Өнөө орой бас ямар хоол хийнэ ээ?

Хэний төлөө амьдарч байна вэ?

Надад бүх юм бий, байгаа зүйлсдээ сэтгэл хангалуун байдаг, хайртай, зүтгэж, хичээж, мөрөөдөж бүтээсэн. Гэхдээ нэг л биш ээ, хэлбэрийн. Ингээд биччихлээ гээд байгаа бүхнээ үгүйсгээд байгаа хэрэг биш л дээ.

Өөртөө гомдоллож байгаа л юм болов уу даа. Яг одоо бол нэг хүний дундуурыг дүүргэж, дутууг нөхөж, тал бие, тал амьдрал нь болчихоод байна. Нөгөө хүнд маань ч ийнхүү санагдаж байж магад. Яагаад гэвэл хэдэн мянган жилийн турш шалгагдаад, шалгараад ирсэн загварын амьдралаар амьдарч байгаа учраас тэр. Гэр бүл болж тоглодог шиг л.

Харин энэ цаг хугацаанд, энэ орон зайд "би" хаахна байна вэ гээд шагайхаар байхгүй. Харагдахгүй, хаагдсан, мартагдсан, хязгаарлагдсан, золиослосон, нуусан, нуугдсан тийм л ертөнц.

Чинадын чинадаас үе үехэн улалзах хувь хүн минь, би ертөнц минь. Унтарч буй галын цог шиг л, магад мод нэмвэл дүрэлзэн асах биз.

Сайхан хөгжим сонсохсон, сайхан бүжиглэхсэн, сайхан суугаад кофе ууж, утаа сүнгэнүүлэхсэн, гэмгүйхэн дүрсгүйтэж хорвоог нэг эргүүлэхсэн, өөртөө нүд унатлаа гоёхсон, өөртөө сэтгэл ханан мишээхсэн ...