Сахиустай бугуйвч

Эртний египетчүүд муу сүнснээс өөрсдийгөө хамгаалан, аз дуудах гэж сахиустай бугуйвч зүүдэг байсан аж. Эзнээ нөгөө ертөнцөд очсон хойно ч сахиусууд ид шидээ алддаггүй, хамгаалсаар байдаг гэж үздэг байж. Дорнын ард түмний эл шүтлэгийг хатан хаан Виктория анх гоёл болгон зүүснээр муу бүхнээс хамгаалж, аз дагуулдаг бугуйвч бүсгүйчүүдийн гоёлын хайрцганд орох нь тэр. Дэлхийн хоёрдугаар дайны үед бүсгүйчүүд исгэрэх сумнаас хайртыгаа хамгаалах гэж өөрийн гараар хийсэн сахиустай бугуйвч бэлэглэдэг байсан бол 1950-1960-аад онд америкийн залуусын дунд ийм бугуйвч ид моодонд орсон юм. Харин 2006 онд “Карибын тэнгисийн дээрэмчин” киноны хувцасны зураачид жижигхэн загалмай, сэлэм, гавалын дүрс бүхий зүүлттэй бугуйвчаар дүрүүдээ гоёсноор мэргжилтнүүдийн анхаарлыг дахин татжээ.Уншигч Та сахиустай бугуйвч худалдаж авья гэхэд 925 сорьцтой, турк мөнгө нь 90.000 дээш, харин мөнгөөр бүрсэн нь хямдаар бодоход 35.000 төгрөг байх болно. Харин үүнээс хямд, өөрт таалагдах загвараар дэгжин бугуйвч хийх аргыг хүргэж байна.

Бэлтгэх зүйл:
• Сонгосон гинж эсвэл хэлхэх материал /би S хэлбэрийн нэхээстэй гинж ашиглана/
• 20 ширхэг мөнгөн хонх
• Өөрт таалагдсан мөнгөн зүүлт 5 ба түүнээс дээш
• Амтай, 4 мм-ийн мөнгөн цагаригууд
• Төмөр утас
• Нарийн хошуутай, хавтгай хошуутай бахьнууд
• Түгжээ
• 2-3 ширхэг бичгийн нарийн хадаас
Хийх арга
1. Бэлэн гинж сонгосон бол Та энэ хэсгийг алгасаж болно. Харин би S хэлбэртэй хэсгүүдээ төмөр утсаар хэлхэж гинж болголоо. Ойролцоогоор 1.3 см урттай 10 ширхэг бэлдэцээ төмөр гархиудаар хэлхэж 19 см урттай бугуйвч бэлэн болно.











2. Гинжнийхээ хоёр үзүүрт түгжээгээ бэхлэхээ мартуузай. Миний сонгосон S хэлбэрийн бэлдэц тусгай түгжээний шаардлагагүй, өөрөөр нь түгжээ хийж болдогоороо давуу талтай.











3. Үндсэн ажил дууссан болохоор одоо чимэглэлээ хийгээрэй. үүнийг өөрийн сонирхол, дурсамж, зөвхөн Танд л утга учиртай байхаар хийж болдогоороо давуу талтай. Ердийн нэг гоёл биш жинхэнэ шидтэй бугуйвч өөрийн гараар урлаж болно шүү дээ. Өмнө нь сонгосон байсан загас, далайн морь, дун, далайн одны дүрстэй таван зүүлтээ бугуйвчиндаа цагаригаар бэхлээрэй.





4. Дараа нь хүссэн зүйл, өөрт ээлтэй чулуу, гарын доорх материалаа /өрөөсөн ээмэг, хуучин зүүлт …/ ашиглан бугуйвчаа чимэглэж болно. Эсвэл бүр урлаачийн уран сэтгэмжийг илтгэх сонирхолтой загвар ч гаргаж болох юм. Миний хувьд шүр, сувс, чулуу, мөнгөлөг бөмбөлөгнүүд ашиглах бөгөөд урьдчилан бичгийн хадаасндаа хэлхэн, унжлага хэлбэртэй болгон бэлтгэсэн байгаа. Та ч гэсэн өөрийн сэтгэмжээр том, жижиг, өнгөлөг, сонирхолтой зүүлтүүдийг хэлхэж болно.


5. Зурагт харагдаж байгаачлан бэлтгэсэн зүүлтүүдээ нарийн үзүүртэй бахиар гинжинд бэхлэн, илүү хэсгийг нь таслаж авна. Гар урахгүй байх ёстой гэдгийг санаж зүүлтүүдийн үзүүрийг тун нямбай таслаж, цэвэрхэн дараарай. Үзүүрийг нь дарахын тулд хумсны өнгөгүй лак дусааж болно. Би таван үндсэн зүүлтний хооронд хоёр, хоёр чимэглэл байхаар бодож 10 ширхэг зүүлт хийсэн.







6. Бугуйвч дуусах дөхөж байна. Хамгийн сүүлийн ажил бол бяцхан хонхнуудаа бэхлэх. Хонхны жингэнээг төвөгшөөх хүнд бол энэ тохирохгүй. Гоёлдоо жаахан дуу чимээ оруулбал сонирхолтой байж болох юм гэсэндээ 20 ширхэг мөнгөн хонх бэлтгэсэн. Үүнийгээ амтай 4 мм-ийн цагаригандаа хоёр, хоёроор нь хэлхэж 10 ширхэг болгоод бугуйвчиндаа зүүнэ.






7. Ингээд би өөрийн гараар урласан сахиустай бугуйвчтай боллоо.

Харри Поттерын фэнүүд мөнгөө цуглуулаарай

Долоон цуврал нь ном хэвлэлийн ертөнц сүүлийн 20 жилд гараагүй амжилт олж, метронд зохиолоо бичдэг байсан бүсгүй шууд л дэлхийн баян эмэгтэйчүүдийн жагсаалтад бичигдэж, “Forbes” сэтгүүлийн шинжээчдийн тооцоолсноор минутад 77 фунтын ашиг олж, түүний бичсэн орчин үеийн үлгэрээр хийсэн уран сайхны кино үзэгчдийг байлдан дагуулж байна. Шинэ номыг нь авах гэж шүтэн бишрэгчид нь номын дэлгүүрийн гадаа шөнөжин дугаарлаж, шинэ ангийг нь үзэх гэж кино театрын тасалбар түгээх цэгийг нураах дөхдөг.
Энэ бол мэдээж Жоан Роулингийн “алтан хүү” “Харри Поттер”. Уран зохиол, кино ертөнцийн түүхэнд тэсрэлт хийгээд зогссонгүй дэлхийн худалдаа, бараа эргэлтийг хөдөлгөх нэг хүч болжээ. Гудамжний зарлал, томоохон худалдааны төвд, лаазтай хийжүүлсэн ундааны саван дээр, аялал жуулчлалын агентлагийн суталчилгаанд ч ид шидтэн хүүгийн зураг залрах болов. Хүүхдийн тоглоомын “Лего” компани хүртэл шилдэг борлуулалтай байгаа үлгэрийн номын баатаруудын дүртэй тоглоом хийх зөвшөөрөл авчээ. Эл түүхийн шүтэн бишрэгчид Хогвартсын сургуулийн дөрвөн тэнхимийн сүлд тэмдэгтэй цамц өмсөж, Харри Поттерынх шиг дугуй хэлбэртэй нүдний шилний хүрээ сонгох болжээ. “Уорнер Брос” компани “Кока Кола”- тай Харри Поттерын зургийг сурталчилгаандаа ашиглах гэрээ байгуулж 150 сая доллар авчээ. Мөн шуудангийн марк, дугуй нүдний шилтэй хүүгийн дүрстэй гэр ахуйн бүтээгдэхүүн гээд зугаа цэнгэлийн зах зээлд (ном, кино,тоглоом, компьютерийн тоглоом, LEGO, дурсгалын зүйлс.)томоохон байр суурьтай Харри Поттер нэртэй 16 тэрбумын үнэтэй брэнд бий болсон юм. Тэгвэл АНУ-ын Флорида мужийн Орланда хотод “Харри Поттерын ид шидийн ертөнц” гэдэг цэцэрлэгт хүрээлэн байгуулагдах гэж байна.

“Өнгөрсөн жилүүдэд бид сая сая
захидал хүлээж авсан.
Дэлхий даяарх сая сая
шүтэн бишрэгч Хогвартсыг
үзэж, Жонна Роулингийн бүтээсэн
ид шидийн ертөнцөд очиж үзэхийг
хүсдэг гэдгээ бичсэн байсан.
Тэгээд л бид ийм төсөл хийх хэрэгтэй
гэж үзээд Юниверсал Орландогийн
амралтын газрынхантай хамтрах гэрээ байгуулсан”
“Уарнер Брос”-ын төлөөлөгч Барри Мэеэр

Дуртай үлгэрийнхээ сүүлийн ангийг гарахыг тэсэн ядан хүлээж буй шүтэн бишрэгчид нь нэгэн том үйл явдлыг хүлээж буй. Гурван жилийн өмнө Харри Поттерын шүтэн бишрэгчид нэгэн том мэдээ дуулсан нь Флорида мужийн Орландо хотод байгуулагдах “Харри Поттерын ид шидийн ертөнц” нэртэй хүрээлэн. “Уарнер Брос”, “Юниверсал Орландо” амралтын төв хамтран 160 саяын өртөгтэй эл төслийг эхлүүжээ.
“Харригийн фэнүүд зөвхөн хүүхдүүд ч биш, бүх насныхан. Тэд хүрээлэнгийн нээлтийн өдрийг тэсэн ядан хүлээж байгааг бид мэдэж байна. Тиймээс ч тэдний хүсэн хүлээж байгаа, мөрөөдөлд нь байдаг тэрхүү ид шидийн ертөнцийг бүтээх гэж төслийн багийнхан чармайн ажиллаж байна. ” хэмээн “Уарнер Брос”-ын ерөнхийлөгч Брэд Глоб ярьжээ. Жоан Роулингийн хүсэлтээр киноны зураачаар ажилласан дизайнер Стюарт Срайг 20 хүнтэй багийнхаа хамт төсөл дээр ажиллаж байгаа. Харин төсөөллийн ертөнц нь биелэж буй Роулинг “Энэ төслийг хийх гэж байгааг сонсоод би маш их сэтгэл догдолсон. Шилтгээний ерөнхий санааг би гаргасан ч үзэгчдийн дуртай, очихыг хүсдэг жинхэнэ Хогвартсыг Стюарт л бүтээсэн юм шүү дээ. Кинонуудаа би үзэх дуртай. Өнгөрсөн он жилүүдэд толгой дотор байсан төсөөллийн ертөнцөө дэлгэцээр хардаг учраас тэр. Харин удахгүй бодитоор харж бүр очдог болох гэж байгаадаа их баяртай байна. Стюарт ажиллаж байгаа болохоор Харригийн сая сая шүтэн бишрэгчийн урам хугарахгүй гэдэгт би итгэж байна” хэмээжээ. Түүнээс гадна Хогвартсын жинэхэнэ оршин суугчид болох жүжигчин Даниэль Радклифф, Эмма Уатсон нар төслийн багийнхантай уулзаж, хүрээлэнгээр аяласан байна.
20 акр (8100 ам метр) газрыг хамарсан бүтээн байгуулалтын ажил энэ оны тавдугаар сарын сүүлээр дуусч, 700 тохой өндөртэй алдарт Хогвартс шилтгээн үүдээ нээн тэрбумаар тоологдох Харригийн шүтэн бишрэгчийг ид шидийн ертөнцдөө хүлээн авах юм. Мөн Хогвартсын ойролцоох ид шидэтнүүдийн тосгон Хогсмийдээр аялуулна. Уурын тэрэгний утаа, галт тэрэгний дохио нь Хогвартын буухиа галт тэрэг ирж байгааг санагдуулна. Элдэв хачин зүйлээр дүүрэн Хагритын овоохойд зочилж, харанхуй ой дахь зоогийн газраас шидэтнүүдийн хоолыг амтлаж, дэлгүүр хэсч шидэт ертөнц дэх аяллынхаа дурсгалыг авч болох гэнэ. Гуравдугаар цуврал “Харри Поттер ба Азкабаны хоригдол” дээр гардаг хагас шувуу, хагас морь хэлбэртэй хиппогрифф тэргүүтэй өвөрмөц уналгуудаар аялна. Ид шидтэй холбоотой дэлхийн бүх ном, хэвлэлүүд зөвхөн Олливандерст байх бөгөөд шидэт саваагаар дохиход л хүссэн номоо авах сонирхолтой үйлчилгээ байх аж.

Английн Оксфордын нэгэн сүмийн танхимыг тэд кинондоо Хогвартсын танхим болгон ашиглажээ.





















Хогвартсын галт тэрэг бол үнэндээ Чарльз Коллеттын 1963 онд бүтээсэн “Olton Hall” загварын зүтгүүр юм.










100 гаруй жилийн түүхтэй Лондон хот дахь “King’s Cross” галт тэрэгний зогсоолыг “Харри Поттер” цувралын кино багийнхан Хогсмидийн галт тэрэгний зогсоол болгон ашиглажээ.